Паводле дадзеных апытання даследчага цэнтра IBRiS, праведзенага па замове газеты «Rzeczpospolita», 63,5% палякаў выступаюць супраць магчымай сустрэчы паміж прэзідэнтам Польшчы Каралем Наўроцкім і Уладзімірам Пуціным падчас саміту G20. Выданне паведамляе, што амаль 30 адсоткаў рэспандэнтаў падтрымліваюць такую сустрэчу, а 6,8% апытаных не маюць на гэты конт пэўнага меркавання.
— Большасць палякаў мае выразную пазіцыю адносна агрэсіі Расіі супраць Украіны, імперскага характару палітыкі Крамля і пагрозы, якую Расія ўяўляе для бяспекі нашага рэгіёна, — падкрэслівае прафесар Аркады Жэгоцкі (Arkady Rzegocki), былы пасол Польшчы ў Лондане і Дубліне.
Ён каментуе таксама той факт, што прыкладна адна трэцяя апытаных лічыць такую сустрэчу магчымай. На думку былога дыпламата, гэта можна растлумачыць перакананнем, што каналы камунікацыі варта падтрымліваць нават з палітычным сапернікам.
нг