Візіт польскага прэзідэнта Караля Наўроцкага ў Белы дом запланаваны на 3 верасня. На думку каментатара выдання Rzeczpospolita Енджэя Белецкага (Jędrzej Bielecki), падарожжа ў ЗША можа толькі ўмацаваць прэзідэнта Караля Навроцкага ў вачах яго выбаршчыкаў. А пра тое, што сапраўды істотна для Польшчы, еўрапейскія лідары дамовіліся ў ЗША ўжо 18 жніўня.
У Прэзідэнцкім палацы меркавалі, што, калі Наўроцкі далучыцца да Эмануэля Макрона, Фрыдрыха Мерца, Джорджыі Мелоні, Кіра Стармера і Аляксандра Стуба ў іх нядаўняй паездцы за акіян, Дональд Трамп можа адмовіцца прыняць яго асабіста праз 16 дзён. Давялося б таксама ўдзельнічаць у далікатнай гульні еўрапейцаў. У вачах Наўроцкага гэта была б змарнаваная вялікая магчымасць паказаць сябе як выбітнага лідара, якога Трамп, у адрозненне ад Дональда Туска, трактуе амаль як роўнага сабе.
Але для Наўроцкага Трамп важны таксама асабіста. Гэта яго ўзор, своеасаблівы гуру. Бясконцая серыя вета на ўрадавыя законы, пагрозлівыя дэкларацыі з паплечнікамі на заднім плане, нават чырвоны гальштук: усё нагадвае Трампа. Нарэшце, нельга выключыць, што менавіта яму прэзідэнт абавязаны выбарчай перамогай: у фінале кампаніі яго прынялі ў Авальным кабінеце, быццам дзейнага кіраўніка дзяржавы.
Такая логіка паказвае і нешта іншае. Для Наўроцкага важныя ўлада і гонар. Але яму далёка да дзяржаўнага дзеяча, для якога на першым месцы стаіць дабро краіны. Саміт на Алясцы быў экзістэнцыяльнай пагрозай для Польшчы. Здавалася, што Трамп аддасць Украіну Расіі. А праз некалькі гадоў гэта магло б непасрэдна пагражаць Польшчы.
Гэтую пагрозу пакуль што адсунулі, бо еўрапейцы заступіліся за Украіну. Яны таксама назвалі «чырвоныя лініі», якіх трэба будзе трымацца падчас перамоў з Масквой. Гэта рэальныя гарантыі бяспекі для ўкраінцаў: іх удзел у перамовах, перш за ўсё тэрытарыяльных, а таксама захаванне свабоды выбару саюзнікаў. Адным словам, захаванне суверэннай украінскай дзяржавы. Задача была настолькі важнай, што Вялікабрытанія, якая лічыць сябе асаблівым саюзнікам ЗША, гэтым разам стала на бок аб’яднанай Еўропы. Вялікі жаль, што польскі прэзідэнт не пайшоў па яе слядах.
нг