Эксперты зазначаюць, што большасць польскага грамадства не жадае паразы Украіне ў вайне. Падобная пазіцыя назіраецца і ў залежнай ад Расіі Беларусі.
У ноч з 9 на 10 верасня, падчас масіраванага нападу Расіі на Украіну, на тэрыторыю Польшчы з Украіны і Беларусі заляцела каля 19 беспілотнікаў. Польскі ўрад звінаваціў Расію ў арганізацыі гэтай атакі, назваўшы яе правакацыяй. Аднак знайшліся сілы ў Польшчы, якія інакш рэагавалі. Так крайне правы палітык Януш Корвін-Мікке заявіў, што атака беспілотнікаў на Польшчу — гэта правакацыя прэм'ер-міністра Туска. «Я насамрэч падазраю, што гэта беспілотнікі, вырабленыя спадарамі Тускам і Сікорскім, якія хочуць распаліць антырасійскую істэрыю». Пасля чаго ён дадаў, што Украіна спрабуе ўцягнуць Польшчу ў вайну. Дэпутат ад руху «Канфедэрацыі» Конрад Берковіч запытаўся, чаму Украіна не збіла гэтыя беспілотнікі, а партыя Браўна задэкляравала, што «вайна Украіны з Расіяй - гэта не наша вайна».
Таксама ў сацыяльных сетках шмат з'явілася каментарыяў, якія негатыўна ставяцца да Украіны. Збольшага, гэта вельмі падобныя допісы, адпраўленыя з розных, часта мала актыўных, профіляў: «Адкуль вы ведаеце, што гэта расійскія дроны?» Яны ж з Украіны. Гэта таму, што Польшча больш не хоча дапамагаць». На думку прафесара Беластоцкага ўніверсітэту, які займаецца пытаннямі бяспекі, Даньеля Бацькоўскага – гэта інфармацыйныя атакі Расіі.
— Гэта дэзінфармацыя, якая, несумненна, ідзе з Крамля і прасоўваецца ў нашу інфармацыйную прастору. Як толькі з'явіліся першая паведамленні пра дроны, я ўбачыў, што розныя дзіўныя профілі пачалі запускаць антыўкраінскі. Паколькі мы яшчэ адчуваем наступствы той палітычнай мітусні, якая папярэднічала прэзідэнцкай кампаніі, якая прывяла да таго, што ў Польшчы з'явілася група людзей, якія, скажам так, скептычна ставяцца да Украіны, гэтыя паведамленні пачалі распаўсюджвацца. Больш за тое, правыя тэлевізійныя станцыі ў нейкі момант пачалі трансляваць гэты наратыў, што прывяло да таго, што іх абсяг стаў шырэйшым.
Расіяне апошнія гады імкнуцца сталы час прасоўваць антыўкраінскія наратывы ў інфармацыйнай прасторы краін Еўропы, для змяншэння падтырмкі для Украіны, зазначае палітолаг Павал Усаў.
— Гэта вынік мэтанакіраванай інфармацыйнай актыўнасці, якая павінна ўзбудзіць у грамадстве краін Захаду, асабліва тых, якія ўвесь час падтрымліваць Кіеў, з мэтай стварыць грамадскую напружанасць і маніпуляваць меркаваннем людзей у дачыненні да Украіны, каб паўплываць на палітычны выбар дадзеных дзяржаў.
Нягледзячы на гэта ў Польшчы застаецца курс на падтрымку Украіны, зазначае Даньель Бацькоўскі.
— На маю думку, цяпер ёсць пэўны дуалізм. З аднаго боку, мы працягваем падтрымліваць Украіну, дзе толькі можам, але з іншага боку, пашыраецца наратыў пра тое, што, скажам так, гэтая дапамога не вечная і патрэбна ўзаемная кампенсацыя. Пры гэтым расійская дэзінфармацыя, якая прасоўвае наратыў, што гэта не наша вайна, што Расія не ўяўляе для нас пагрозы і гэтак далей, цалкам не прыжылася, у гэтым сэнсе расіяне прайгралі.
Таксама расійская прапаганда не змагла прывіць антыўкраінскае стаўленне і ў Беларусі, зазначае палітолаг Павал Усаў.
— У Беларусі настроі збольшага праукраінскія. Гэта адна з прычын, чаму Лукашэнка ўстрымаўся ад таго, каб уцягнуць краіну ў вайну супраць Украіны. Пры гэтым грамадзяне Беларусі бяруць удзел у вайне як з украінскага боку, так і з расійскага. За Расію ваююць некалькі сотняў наёмнікаў, за Украіну змагаецца Полк Каліноўскага, тысячы людзей дапамагалі ўкраінцам ды данацілі ЗСУ. Праукрінская пазіцыя ў Беларусі слаба артыкулюецца з прычыны рэпрэсій ды ціску, за праўкраінскія настроі рэжым Лукашэнкі кідае людзей у турму.
Расія імкнецца ўплываць на грамадскія настроі ў Еўропе, пашыраючы антыўкраінскія наратывы. Пакуль гэта не зусім ўдаецца, большасць грамадства ў суседніх Польшчы ды Беларусі, сімпатызуе змаганню ўкраінцаў.
Юры Ліхтаровіч