Канцлер Германіі Фрыдрых Мерц усё больш дыстанцуецца ад прэзідэнта Дональда Трампа ў вайне з Іранам, і Трамп можа прымусіць Германію адчуць свой гнеў, піша нямецкі штотыднёвік Der Spiegel.
Як нагадвае штотыднёвік, Мерц хацеў бы прыняць прэзідэнта ЗША ў Германіі ў верасні. Аднак гэты візіт застаецца пад пытаннем. Нядаўна канцлер прызнаў, што лідар Белага дома «зараз не ў лепшым настроі».
— Да гэтага часу, як перакананы прыхільнік трансатлантызму, старшыня ХДС спрабаваў падтрымліваць разумныя працоўныя адносіны з лідарам Белага дома і крытыкаваць яго толькі за зачыненымі дзвярыма і ўзважана. (...) Цяпер жа Мерц публічна дыстанцуецца ад Трампа па пытанні вайны з Іранам, што выклікае ўсё большы гнеў прэзідэнта ЗША, — паведамляе Der Spiegel.
Нямецкі штотыднёвік сцвярджае, што Берлін, «відавочна, прызнае, што цяперашняя стрыманасць прэзідэнта не азначае, што ён улічвае нямецкія ці еўрапейскія інтарэсы ў сваіх рашэннях».
У той жа час расце занепакоенасць наступствамі вайны, бо «ніякай стратэгіі спынення канфлікту не прадбачылася, а яго наступствы ўжо адчуваюцца ва ўсім свеце — у тым ліку ў Германіі».
«Der Spiegel» піша, што, хоць «канфрантацыйны падыход канцлера зразумелы», ён таксама «нясе рызыкі». Асноўная занепакоенасць тычыцца трансатлантычных адносін.
— Калі сітуацыя складзецца неспрыяльна, Трамп, вядомы сваёй схільнасцю да помсты, можа ўспомніць крытыку падчас будучых перамоваў, напрыклад, па гандлі, — сцвярджае штотыднёвік. — Акрамя таго, спрэчка паміж Трампам і Мерцам «можа мець рэальныя наступствы для падтрымкі Украіны».
Нямецкая газета адзначае, што вывад амерыканскіх войскаў з Германіі ў цяперашні час не плануецца, але Трамп разглядаў гэта ў мінулым. Аднак там папярэджваюць, што «рашэнне можа змяніцца ў любы момант».
Forsal/ав