Польшча рыхтуецца прыняць першыя знішчальнікі пятага пакалення F-35 ужо летам 2026 года. Цяпер восем польскіх машын знаходзяцца ў Злучаных Штатах на базе Эбінг (Ebbing), дзе навучанне праходзяць польскія пілоты і тэхнічны персанал. Усяго Варшава замовіла 32 самалёты.
Пра гэта ў размове з польскім выданнем «Forsal» паведаміў менеджар кампаніі Lockheed Martin па развіцці бізнесу ў Цэнтральнай, Усходняй і Паўднёвай Еўропе Джонатан Лін (Jonathon Linn).
Паводле яго слоў, пастаўкі адбываюцца паводле графіку, а кампанія не бачыць пагрозы затрымак. Lockheed Martin цяпер вырабляе 156 F-35 штогод, а ў рэкордны год паставіла 191 машыну.
Амерыканскі канцэрн падкрэслівае, што супрацоўніцтва з Польшчай не абмяжоўваецца толькі закупкай самалётаў. Lockheed Martin хоча пашыраць польскі ўдзел у глабальным ланцужку паставак для праграмы F-35. Польскія прадпрыемствы ўжо вырабляюць асобныя кампаненты для амерыканскіх падрадчыкаў, а завод PZL Mielec выпускае больш за 70% фюзеляжа для самалёта F-16.
Кампанія таксама не выключае супрацоўніцтва ў вытворчасці ракет і боепрыпасаў. У Lockheed Martin адзначаюць, што гэта адзін з прыярытэтных кірункаў у перамовах з польскім урадам. Аднак пакуль няма інфармацыі пра канкрэтныя кантракты або рашэнні па вытворчасці ракет AMRAAM у Польшчы.
Асобная ўвага надаецца інтэграцыі F-35 з польскай сістэмай супрацьпаветранай абароны. Паводле Джонатана Ліна, знішчальнік можа працаваць як элемент адзінай сеткі кіравання і перадаваць дадзеныя сістэмам Patriot або іншым сродкам СПА. Такія сцэнарыі ўжо адпрацоўваліся падчас вучэнняў NATO у Рамштайне.
Lockheed Martin таксама прапануе Польшчы магчымасць выкарыстання беспілотнікаў-суправаджальнікаў новага пакалення. Гаворка ідзе пра платформу Vectis, распрацаваную у межах праграмы Collaborative Combat Aircraft — гэта так званыя “верныя вядомыя”, якія могуць дзейнічаць разам з F-35.
Пры гэтым пытанне стварэння ў Польшчы сэрвіснага або навучальнага цэнтра для F-35 пакуль застаецца адкрытым. Lockheed Martin заяўляе, што такі цэнтр можа быць створаны, калі гэтага захоча польскі ўрад. Але кампанія пацвердзіла, што цяпер не вядзе перамоў з польскімі дзяржаўнымі прадпрыемствамі наконт рамонту найбольш сакрэтных stealth-пакрыццяў F-35.
нг