Прэзідэнт Турцыі Рэджэп Таіп Эрдаган падарыў лідарам НАТА рэвальверы з баявымі патронамі, паведамляе польскі партал Money. 7-8 ліпеня Анкара прымала саміт Паўночнаатлантычнага пакту.
У прыватнасці, пра незвычайны падарунак расказаў прэм'ер-міністр Вялікабрытаніі Кір Стармер. Ён паведаміў, што на кожным рэвальверы ёсць выгравіраванае імя абдорванай асобы, а да падарунка быў прыкладзены дазвол на вываз зброі з Турцыі.
Стармер таксама сказаў, што яму давялося пакінуць пісталет у Турцыі, бо яго ўвоз у Вялікабрытанію — незаконны, нягледзячы на дакументы, прыкладзеныя да падарунка.
Сярод атрымальнікаў падарунку — таксама канцлер Германіі Фрыдрых Мерц. Кіраўнік германскага ўраду перадаў рэвальвер у пасольства ФРГ у Анкары, дзе ён будзе зарэгістраваны ў якасці афіцыйнага падарунку і пазней, пасля вырашэння фармальнасцей, будзе дастаўлены ў Германію.
Сусветныя СМІ паведамляюць, што лідары краін НАТА, у якіх дзейнічаюць строгія правілы ўвозу зброі, пакінулі свае падарункі ў Турцыі.
Прэзідэнт Польшчы Караль Наўроцкі таксама атрымаў рэвальвер, пацвердзіў дырэктар Упраўлення міжнароднай палітыкі Канцылярыі прэзідэнта Марцін Пшыдач.
— Сапраўды, прэзідэнт Турцыі падарыў кожнаму са сваіх гасцей такі падарунак. Я дакладна не ведаю, ці гэта рэпліка, ці арыгінал. Вядома, ніхто з яго страляць не будзе, — сказаў ён.
Пшыдач таксама сказаў, што пасля вяртання з Турцыі ў Варшаўскім міжнародным аэрапорце імя Шапэна рэвальвер быў перададзены Мытна-падатковай службе для юрыдычнай ацэнкі на прадмет увозу зброі ў Польшчу і для аплаты мыта.
Прадстаўнік Канцылярыі прэзідэнта таксама зазначыў, што ў дыпламатыі не прынята адмаўляцца ад падарункаў. Пры гэтым ён прызнаў, што рэвальвер у якасці падарунка — даволі незвычайная рэч, але польская прэзідэнцкая адміністрацыя ўспрымае яго як жэст павагі з боку Эрдагана.
вс