Тайвань працягвае маштабную мадэрнізацыю ўзброеных сіл на фоне пастаяннага ціску з боку Кітая. У рамках праграмы Iron Cavalry Project востраў плануе ў 2028–2033 гадах паставіць войску 246 новых браніраваных разведвальных машын уласнай распрацоўкі, робячы стаўку на развіццё нацыянальнай абароннай прамысловасці, пішуць на партале defence24.pl.
Новыя машыны будуць выкарыстоўвацца разведвальнымі падраздзяленнямі для назірання за полем бою, патрулявання і падтрымкі войскаў. Аўтамабіль з колавай формулай 4×4 абсталяваны рухавіком магутнасцю 205 к.с., развівае хуткасць да 100 км/г, мае запас ходу каля 500 км і сучасную аптыка-электронную сістэму, здольную выяўляць цэлі на адлегласці да 12 км. Узбраенне складаецца з дыстанцыйна кіраванага модуля з кулямётам калібру 12,7 мм.
Развіццё новых узбраенняў адбываецца паралельна з пашырэннем тайваньскіх інвестыцый у Еўропе. Адным з ключавых партнёраў Тайваня становіцца Польшча. Каля Уроцлава плануецца стварэнне тэхналагічнага парку TEEMA Technology Park, дзе будуць выпускаць серверы для штучнага інтэлекту, электроніку і кампаненты для электрамабіляў. У перспектыве праект можа далучыцца да вытворчасці перадавых паўправаднікоў.
Улады Тайваня разглядаюць развіццё ўласнай абароннай прамысловасці і міжнароднай тэхналагічнай кааперацыі як ключавыя элементы ўмацавання нацыянальнай бяспекі ва ўмовах росту напружанасці вакол выспы. Для Польшчы ж супрацоўніцтва азначае доступ да сучасных тэхналогій і ўмацаванне пазіцый у еўрапейскіх ланцужках вытворчасці высокатэхналагічнай прадукцыі.
эж