Праваабаронцы кажуць пра паказальны палітычны прысуд, паведамляе Радыё «Свабода».
Учора Менскі гарадскі суд прызнаў вінаватымі ў пашкоджанні будынку, вырабе небяспечнага прыстасавання («кактэйль Молатава»), нанясенні шкоды Мікіту Емяльянава і Івана Комара. Іх асудзілі на 7 гадоў зняволення ў калоніі ўзмоцненага рэжыму.
Такое рашэнне прыняў суддзя Аляксандр Якунчыхін. Дзяржаўны абвінаваўца Максім Сеніў прасіў роўна такога пакарання.
Абодва падсудныя сказалі, што будуць абскарджваць вырак і што прысуд палітычны. Заля сустрэла прысуд воклічам «Ганьба!»
Акрамя таго, з абодвух падсудных пастанавілі спагнаць 330 рублёў на судовыя выдаткі, а з Емяльянава – 1 рубель 48 капеек на карысць СІЗА. Менавіта ў 1,48 рубля міліцыянты ацанілі страты, нанесеныя дзвярам установы, у якія пацэліў «кактэйль Молатава».
На думку праваабаронцы Валянціна Стэфановіча, пакаранне звыш жорсткае і палітычна матываванае. Па-першае, таму, што акцыя маладзёнаў тычылася будынку следчага ізалятара. Па-другое, цяпер год прэзідэнцкіх выбараў. Жорсткае пакаранне патрэбна ўладам, каб перадухіліць падобныя дзеянні, патлумачыў юрыст.
юл