Гродзенскі гарвыканкам адмовіў у правядзенні мітынга, які планаваўся пратэсна-настроенымі гараджанамі ў наступную нядзелю ў Каложскім парку.
Заяўку на мітынг у Каложскім парку, у месцы, якое вызначана Гродзенскім гарвыканкамам для правядзення масавых мерапрыемстваў, падалі фізічныя асобы.
Кіраўнік Гродзенскай арганізацыі БНФ Вадзім Саранчукоў кажа, што рашэнне аб падачы заяўкі прымалася прадстаўнікамі ўсіх апазіцыйных партый і рухаў.
І рабілася гэта на падставе таго, што два месяцы актыўных пратэстаў не прыносяць вынікаў, а людзей затрымліваюць, судзяць, штрафуюць і працягваюць збіваць. Кажа Вадзім Саранчукоў:
«Гэта была спроба вярнуць пратэсты ў прававое поле, што і гарантуе наша Канстытуцыя».
Адмаўляючы гродзенцам сабрацца на мітынг легальна ўлады ў сваёй адмове спаслаліся на дрэнную эпідэміялагічную сітуацыю, маўляў, прыйшла другая хваля каранавіруса.
Саранчукоў кажа, што ўсе фармальныя патрабаванні пры падачы заяўкі яны выканалі і спадзяваліся, што дазвол на правядзенне мітынга атрымаюць.
Цяпер стала відавочным, паводле кіраўніка БНФ, што ўлады не пагаджаюцца і на афіцыйныя мерапрыемствы.
Алесь Завіноўскі