Грамадзянін Ізраіля Аляксандр Фруман, які ў жніўні быў затрыманы ў Мінску на 78 гадзін і перажыў здзекі сілавікоў, 13 лістапада падаў заяву ў ізраільскую паліцыю, паведамляе «Свабода» са спасылкай на суполку «Беларусы ў Ізраілі».
Фруман спадзяецца на прымяненне ўніверсальнай юрысдыкцыі ў дачыненні да беларускіх сілавікоў. Імёны сваіх крыўдзіцеляў Аляксандр даведаўся з апазіцыйных Тэлеграм-каналаў.
Аляксандр Фруман, спецыяліст па базах дадзеных і статыстыкі быў затрыманы ў Мінску, на праспекце Незалежнасці, калі гуляў разам з жонкай. Пасля таго, як ён сфатаграфаваў тэлефонам аўтобус з міліцыянтамі, яго нечакана схапілі людзі ў чорным, збілі і пасадзілі ў аўтазак, працягваючы наносіць удары дубінкамі.
«Пасля падачы маёй заявы яны мусяць пачаць расследаванне. Запытаць відэа з вонкавых камер унутранага двара Савецкага РУУС. Прасіць допыту тых, хто ў гэтым удзельнічаў. Я перадаў міліцыі ўсе імёны супрацоўнікаў РУУС і некалькіх дакладна апісаў, што яны кіравалі катаваннямі. Таксама яны мусяць дапытваць сведак, хлопцаў і дзяўчат, што былі са мной падчас усяго зняволення.
Паводле закону ізраільская паліцыя абавязаная гэта зрабіць, у нас жа не Беларусь. Інакш да іх будуць ужытыя санкцыі за бяздзейнасць. Для мяне важная дамагчыся, каб іх унеслі ў спісы невыязных і падалі іх у міжнародны вышук», - заявіў Аляксандр Фруман.
Падчас пратэстаў пасля прэзідэнцкіх выбараў у Беларусі былі затрыманыя і іншыя ізраільскія грамадзяне — Арцём Пронін, Станіслаў Рабунскі і Ганна Сіроціна.
аз