Паводле міліцэйскага пратаколу, 25 снежня Алена Літвінава «без дазволу выканкама прыняла актыўны ўдзел у несанкцыянаваным мітынгу ў лясным масіве каля вёскі Новая Бухалаўка». Тады група жыхароў Гомля зладзіла навагодні пікнік – вадзілі ў лесе карагод вакол ялінкі, смажылі сала. Усе былі ў масках. Некаторыя мелі бел-чырвона-белыя сьцягі. За гэты пікнік жыхарка Гомля цяпер адбывае 7-дзённы арышт.
Алена Літвінава пяць сутак да суду – з 6 студзеня – была ў ізалятары часовага ўтрымання, хоць заканадаўства дазваляе трымаць чалавека па адміністрацыйнай справе да суду толькі 72 гадзіны.
Вечарам 6 студзеня жанчына збіралася ў царкву на службу з нагоды Раства, а апынулася ў ІЧУ.
«Правапарушэнне не даказанае. Маёй падабароннай не тлумачылі правы і абавязкі. Доказы ў справе – скрыншоты і здымкі, мая падабаронная не пацвердзіла, яна на іх ці не. Лічу, што гэтыя доказы недапушчальныя, справу трэба спыніць», – казала адвакатка.
Суддзя патлумачыў, што па міліцэйскіх дакументах настаўніца была затрыманая 9 студзеня. Што яна рабіла з 6 студзеня па 9 студзеня ў ІЧУ – не далі адказу ні міліцыянты, ні суд.
Паводле svaboda.org/яс