У Гродне праходзіць суд над музыкантам Ігарам Банцарам. Паводле дзяржаўнага абвінавачання, Банцэр 5 верасня быў у ап’яненні, зняў штаны і танцаваў у стрынгах перад міліцыянерам і кіроўцам ў службовай машыне.
У судзе ён запатрабаваў, каб працэс вялі па беларуску, але хадайніцтва не задаволілі.
Затым абвясціў сухую галадоўку, бо справа, на яго думку, мае палітычныя матывы.
Паводле праваабаронцы Уладзімера Хільмановіча, Ігар хоць і імкнецца заставацца бадзёрым, але справа выглядае зусім непрыемна.
- Сітуацыя выглядае дастаткова трагічна, бо чалавек абвясціў сухую галадоўку і ёсць прамая пагроза ягонаму жыццю. А калі казаць юрыдычна, то дзеянні Банцара максімум можна было б характарызаваць, як дробнае хуліганства.
У судзе дапытаны сведкі-міліцыянты, працэс перанесены.
Алесь Завіноўскі