Беларуская пракуратура абвінаваціла Анжэліку Борыс і некалькіх актывістаў Саюза палякаў у распальванні нацыянальнай варожасці.
Федэрацыя польскай дыяспары ў Францыі напісала, што з вялікай заклапочанасцю і трывогай назірае за напружанай сітуацыяй у Беларусі, уключаючы эскалацыю рэпрэсій супраць Саюза палякаў. У сваю чаргу, Рада Супольнасці польскіх арганізацый у Аўстрыі «Forum Polonii» рашуча асуджае «незаконны арышт Анжэлікі Борыс, Анджэя Пачобута, Ганны Панішавай і іншых прадстаўнікоў Саюза палякаў Беларусі». Падобныя лісты падтрымкі прыйшлі, у прыватнасці, ад Каталіцкай польскай абшчыны ў Бразіліі і Саюза палякаў Украіны.
Сакратар Галоўнага праўлення Саюза палякаў Беларусі Анджэй Пісальнік сказаў Польскаму радыё, што затрыманне старшыні арганізацыі Анжэлікі Борыс і іншых кіраўнікоў не паўплывае на працу арганізацыі:
-Часовая адсутнасць старшыні ні ў якім выпадку не адаб’ецца на дзейнасці СПБ. Саюз будзе рэалізоўваць статутныя заданні, як рабіў гэта раней. Будзе ладзіць культурніцкія імпрэзы і весці навучанне польскай мовы.
Анджэй Пісальнік дадаў, што ўчора адвакаты сустрэліся з затрыманымі лідарамі польскай меншасці.
ав