Гродзенская крама з нацыянальнымі сувенірамі «Адметнасць» атрымала ліст з гарвыканкама, у якім патрабуецца прыбраць «палітычную рэкламу». Што маецца на ўвазе пад «палітычнай рэкламай», у лісце не гаворыцца.
Гаспадыня крамы «Адметнасць» Вольга Верамеенка ў разгубленасці. Справа ў тым, што ў лісце не ўказана, што канкрэтна маецца на ўвазе пад «палітычнай рэкламай».
«Нам не зразумела, што з гэтым рабіць, якія рэчы канкрэтна прыбіраць. Незразумела, як яны праводзілі маніторынг. І ўвогуле мы лічым, што ў нас няма ні тавараў, ні рэчаў, якія нясуць палітычную рэкламу».
Вольга кажа, што напісала ў гарвыканкам ужо два лісты і просіць тлумачэнняў.
Яна кажа, што маніторынг прыходзяць праводзіць патаемна і не прадстаўляюцца.
Верамеенка лічыць, што ўсё гэта робіцца з мэтай ціску на іх краму. «Але мы працуем па закону і ў нас на ўсё ёсць дакументы», - кажа гаспадыня крамы.
Алесь Завіноўкі, Гродна