Сацыяльная служба дапамогі беларусам і беларускам «Адно акно» ў супрацоўніцтве з высока прафесійнымі адвакатамі прапануюць «гарачую лінію» з дзяжурствамі адвакатаў. Некалькі разоў на месяц будзе магчымасць ананімна і бясплатна атрымаць юрыдычную кансультацыю.
Прапанова стала вынікам разумення таго, што ў Беларусі працягваюцца палітычныя рэпрэсіі і прававы дэфолт. Доступ да кваліфікаванай юрыдычнай дапамогі абмежаваны, а зварот за падтрымкай спалучаецца з рызыкай для бяспекі – асабліва калі ідзе размова пра справы з палітычнай матывацыяй.
Першая сесія – 5 красавіка з 15:00 да 17:00 па беларускім часе.
Як атрымаць кансультацыю?
5 красавіка з 15:00 да 17:00 дастаткова будзе зрабіць званок па спасылцы, каб ананімна задаць пытанні і атрымаць кваліфікаваную юрыдычную кансультацыю.
Можна звяртацца з грамадзянска-прававымі (нерухомасць, правы спажыўцоў, спадчына і тастаменты) пытаннямі; па сямейным праве (развод, аліменты, падзел маёмасці, апякунства і г.д.); адміністрацыйным праве (штрафы, абскарджанні, пазбаўленне правоў, рэгістрацыя бізнесу, абарона правоў у сферы сацыяльных паслуг); па крымінальным праве (кансультацыі і абарона па справах аб ДТЗ, крадзяжах і іншых злачынствах, дапамога пры затрыманні і арышце, працэдуры змякчэння пакарання, амністыя і г.д.).
Аператаркі на лініі не запісваюць і не захоўваюць дадзеныя пра званкі. Усё тэлефанаванні праходзяць праз бяспечную платформу з выкарыстаннем сучасных пратаколаў шыфравання. Гэта выключае магчымасць праслухоўвання ці перахопу дадзеных трэцімі асобамі, паведамляюць у службе.