Удзельнікі Гуманітарнага фонду атрымалі справаздачу пра парушэнні, у якой паведамлялася, што паводле вынікаў расследавання, NHC (Нарвежскі Хельсінкскі камітэт), які ёсць аператарам фонду, рэкамендуе спыніць супрацу з BY_help, паведамляе «Еўрарадыё».
18 сакавіка 2025 года Нарвежскі Хельсінкскі камітэт распачаў расследаванне ў дачыненні аднаго з удзельнікаў Гуманітарнага фонду. Тады ж усе аперацыі ў межах фонду былі прыпыненыя.
26 траўня года ўдзельнікі Гуманітарнага фонду (акрамя BY_help, туды ўваходзяць «Краіна для жыцця», BYSOL, Dissidentby, «Вольныя» і іншыя) атрымалі справаздачу пра парушэнні. Там паведамлялася, што на падставе вынікаў расследавання NHC рэкамендуе спыніць супрацу з BY_help.
Сярод заўваг да фонду BY_help, змешчаных у справаздачы, пазначаныя:
- сталы недахоп даверу ў камунікацыі;
- неаднаразовая ненадзейнасць у выкананні абавязанняў;
- адсутнасць празрыстасці ў аперацыях і прыняцці рашэнняў;
- нізкая адміністрацыйная здольнасць і нежаданне паляпшаць працэсы;
- справаздачнасць, што не адпавядае стандартам NHC і патрабаванням донараў.
BY_help абвясціў пра добраахвотны выхад з Гуманітарнага фонду.
30 чэрвеня Хельсінкскі камітэт зрабіў поўную справаздачу пра парушэнні, знойдзеныя ў дзейнасці BY_help у межах Гуманітарнага фонду. Было пастаноўлена спыніць супрацу паміж ГФ і BY_help.
«BY_help прайшоў паўнавартасны аўдыт атрыманых ад фонду грошай, і пытанняў што да іх мэтавага выкарыстання не ўзнікла. Усе траты былі задакументаваныя адпаведнымі рахункамі і прынятыя аўдытарам напоўніцу. Для нас галоўнае, што мэтавасць выкарыстання грошаў не аспрэчваецца. Што да астатняга – гэта ўжо дробязі. Але ўлічваючы ўнутраную спрэчку, наш фонд прыняў рашэнне выйсці з Гуманітарнага фонду самастойна», – пракаментаваў сітуацыю кіраўнік BY_help Аляксей Лявончык.
BY_help працягне аказваць дапамогу і пры гэтым, як і раней, выкарыстоўваць мінімальную суму на адміністрацыйныя выдаткі і максімальную – на дапамогу мэтавай аўдыторыі, абяцае Лявончык.
эж