«Гэтай ноччу ў Мінску быў збіты чарговы расійскі беспілотнік. Ён упаў побач з дзіцячым садком №12 і праляжаў там паўгадзіны да прыезду міліцыі. На шчасце, гэтым разам абышлося без ахвяраў. Але толькі за тыдзень на тэрыторыю Беларусі заляцела 59 дронаў, і тое, што ніхто не пацярпеў, – гэта ўсяго толькі шчаслівы збег абставінаў», – такім чынам дэмакратычная лідарка Беларусі Святлана Ціханоўская пракаментаравала падзенне беспілотніка ў Мінску.
Паводле яе, рэжым лічыць нармальным трымаць грамадзянаў у няведанні: «Не папярэджвае пра пагрозы праз SMS ці ТБ альбо радыё. Не дае інструкцыяў, як гарантаваць бяспеку дзецям альбо сталым людзям. Не раскрывае падрабязнасцяў інцыдэнтаў. Для рэжыму куды важней трымаць грамадзянаў пад кантролем, чым клапаціцца пра іх здароўе ды бяспеку», – падсумавала Святлана Ціханоўская ў сацсетках.
Беспілотнік, які ўпаў уначы 29 ліпеня ў Мінску, быў начынены тратылам і вялікай колькасцю паражальных элементаў, вынікае з заявы Следчага камітэта, якую цытуе «Позірк». Распачатая крымінальная справа. СК пацвердзіў, што абломкі беспілотніка пашкодзілі некалькі прыпаркаваных аўтамабіляў і прызямліліся на прылеглую да дома тэрыторыю.
У выніку здарэння пацярпелых няма, эвакуацыя жыхароў не праводзілася.
аз