Жыхара Ваўкавыска завочна асудзілі за «здраду дзяржаве»

Агулам з 2020 года за «здраду дзяржаве» ў Беларусі былі асуджаныя мінімум 108 чалавек.

Андрэй Занеўскі

https://spring96.org

У Гродзенскім абласным судзе 28 ліпеня абвясцілі завочны прысуд 39-гадоваму Андрэю Занеўскаму. Яго абвінавацілі ў «выдачы замежнай дзяржаве і яе прадстаўнікам дзяржаўных сакрэтаў Рэспублікі Беларусь» (здрада дзяржаве), але сутнасць абвінавачвання невядомая. На падставе ч. 1 арт. 356 Крымінальнага кодэкса жыхару Ваўкавыска завочна прызначылі 11 гадоў калоніі ва ўмовах узмоцненага рэжыму.

Як стала вядома праваабаронцам, працэс па справе Андрэя Занеўскага распачаўся 16 чэрвеня ў Гродзенскім абласным судзе. Сутнасць абвінавачвання невядомая.

У «Белпол» распавялі, што Андрэй Занеўскі нарадзіўся ў Ваўкавыску. Да 2018-га года працаваў у «Ваўкавыскай камунальнай гаспадарцы», а потым адкрыў сваё прадпрыемства. У гэтым жа годзе УКДБ па Гродзенскай вобласці ўзбудзіла ў дачыненні да яго крымінальную справу паводле ч.1 арт. 375 КК (наўмыснае разгалашэнне службовай таямніцы). Згодна версіі абвінавачвання, Занеўскі з лютага 2014 года па студзень 2015, знаходзячыся на тэрыторыі Рэспублікі Польшча, наўмысна разгалосіў звесткі, якія складаюць службовую таямніцу. У 2019 годзе расследаванне было прыпыненае праз немагчымасць вытворчасці следчых дзеянняў. Невядома, ці цяпер Андрэя Занеўскага асудзілі па перакваліфікаванай старой справе, ці па новай.

Агулам з 2020 года за «здраду дзяржаве» былі асуджаныя мінімум 108 чалавек.

аз