Праваабаронца «Вясны» Алег Мацкевіч прааналізаваў адкрытыя крыніцы інфармацыі і сведчанні былых палітзняволеных пра выраб у калоніях рэчаў вайсковага прызначэння, паведамляе Свабода.
Паводле праваабаронцы, існуе беспасрэдная сувязь паміж прымусовай працай зняволеных і задавальненнем вайсковых патрэбаў Расіі, якая вядзе вайну супраць Украіны.
Прадукцыя вайсковага прызначэння, вырабленая ў беларускіх калоніях і адпраўленая ў Расію для падтрымання хаўрусніка, стала неад’емнай часткай укладу, які рэжым Лукашэнкі ўносіць у агрэсіўную вайну, лічыць Алег Мацкевіч.
Праваабаронца заўважае, што на сайце Дэпартамента выканання пакаранняў МУС Беларусі такую прадукцыю знайсці немагчыма, але яна ёсць у каталогу інтэрнэт-крамы ведамства. Там у спісе для куплі наступныя тавары: скрыня вайсковая, плашч-накідка, мундзіры, кіцель, два віды вайсковых гарнітураў, кабуры для пісталета Макарава і рэвальвера сістэмы «Наган», розныя вайсковыя рамяні, у тым ліку для аўтамата АКС-74.
Свабода/ав