Імя Аляксея Кердаля з'явілася ў спісе «тэрарыстаў», які стварае КДБ. Гарадзенец выдаліў каментары, але гэта не дапамагло, піша Наша Ніва.
Аляксею Кердалю 33 гады. Ён гарадзенец. Пасля школы адслужыў у арміі. Апошнія гады Аляксей працуе барыстам у Гродне. Таксама з 2020-га ў яго быў невялікі бізнес — кампанія, сферай дзейнасці якой пазначана «прадастаўленне месцаў для пражывання на тэрыторыі кемпінгаў і лагераў».
Як пісала Наша Ніва раней, падобна, у беларускіх спецслужбаў ёсць уласная база каментароў карыстальнікаў чатаў. Але калі акаўнт быў прывязаны да ўласнага беларускага нумара, падпісаны ўласным імем ці яго яшчэ неяк ідэнтыфікавалі, то абараніць сябе нашмат менш магчымасцяў. Можна выдаліць каментары, але гэта на 100% не абароніць.
Аляксея Кердаля асудзілі па артыкуле 130 КК Беларусі — «распальванне варожасці». Прысуд набыў сілу, хутчэй за ўсё, яго праз пару дзён дададуць і ў міліцэйскі спіс «экстрэмістаў».
Вядома, што Аляксей Кердаль цяпер за кратамі.
НН/ав