Аб гэтым піша канал Dissidentby. Паводле ягоных звестак, шмат людзей паведамляе, што да іх сваякоў у Беларусі прыходзяць з ператрусамі і допытамі. Справа тычыцца як тых, хто ўдзельнічаў у акцыях за межамі Беларусі (іх абвінавачваюць па артыкуле 361-4 КК РБ), так і тых, хто быў удзельнікам пратэстаў у 2020 годзе (іх абвінавачваюць па арт. 342 КК РБ або 293 КК РБ).
Некалькі новых фактаў з таго, як шукаюць удзельнікаў акцый пратэсту ў 2020:
- на каналах спецслужбаў выкладаюць фотаздымкі з акцыі для апазнання ўдзельнікаў пратэстаў. Таксама вельмі шмат матэрыялаў для апрацоўкі знаходзіцца на тэлефонах і кампутарах ужо затрыманых (вы маглі трапіць на чужую камеру).
- апрацоўваюцца фотаздымкі з кнігі, выдадзенай у Польшчы «Marsz Białorusi. Sierpień–grudzień 2020» (112 старонак).
Што гэта значыць?
1. Рэпрэсіі не спыніліся. Устрымайцеся ад паездкі ў Беларусь або любую іншую краіну, якая супрацоўнічае з беларускім рэжымам.
2. Пракансультуйце сваіх блізкіх, што рабіць у выпадку, калі да іх прыходзяць спецслужбы:
- не панікаваць і прасіць прадставіць дакументы, якія пацвярджаюць іх асобы
- не захоўваць дома каштоўных рэчаў або вялікіх сум грошаў, якія могуць забраць надоўга пры ператрусе
- не пагаджацца даваць паказанні супраць сваіх блізкіх, то бок вас (мы раім спасылацца на арт. 27 Канстытуцыі РБ.Канешне, тут залежыць ад дадзенага чалавека, яго стаўлення, але спрабуйце разам выпрацаваць стратэгію на такі выпадак, якая будзе вам падыходзіць і не зробіць нікому горш).
Сайт прапануе паведамляць праваабаронцам пра палітычны пераслед праз бяспечныя крыніцы.