Поўнага пераходу на беларускую бульбу запатрабаваў Аляксандр Лукашэнка ад сеткі Mak.by падчас рабочай паездкі ў Кіраўскі раён (Магілёўская вобласць), паведамляе «Позірк».
«Каб у Mak.by з 1 кастрычніка не было ніводнага кавалка імпартнай бульбы. І катлеты. Там павінна быць беларускае. Што вы гэтую гадасць амерыканскую людзям падсоўваеце?» – цытуе Лукашэнку неафіцыйны тэлеграм-канал яго прэс-службы.
Пры гэтым, як адзначаецца, чыноўнікі «далажылі» свайму кіраўніку, што ўжо са жніўня ўся бульба ў Маk.by – «з Талачына».
Гаворачы ў цэлым пра ўраджай бульбы, Лукашэнка заявіў, што сёлета ён будзе «дастатковым», паколькі было прынята рашэнне аб павелічэнні плошчаў яго вырошчвання.
Як заяўляецца, ён «папярэдзіў, што сёлета напэўна захаваецца значны попыт на бульбу за межамі краіны, у тым ліку ў суседняй Расіі».
Лукашэнка заклікаў пастаўшчыкоў бульбы «адладзіць выразныя сувязі з гандлёвымі сеткамі, каб яны своечасова пастаўлялі бульбу ў крамы і каб не паўтарылася сітуацыя вясны гэтага года».
Дэфіцыт бульбы вясной стаў прадметам неаднаразовых разбіральніцтваў на нарадах з удзелам Лукашэнкі.
У лістападзе 2022 года беларускае прадстаўніцтва сеткі рэстаранаў «Макдональдс» паведаміла аб хуткім сыходзе з беларускага рынку, а затым – пра тое, што на працягу некалькіх тыдняў рэстараны пачнуць працаваць пад расійскім брэндам «Смачна – і кропка».
Пасля рэстараны былі перайменаваныя ў Mak.by і працуюць пад гэтай назвай.
У снежні мінулага года ў Міністэрстве антыманапольнага рэгулявання і гандлю (МАРГ) назвалі Mak.by, «буйной беларускай сеткай» з нацыянальнай кухняй.
аз