Дагэтуль невядома, у якую калонію накіраваны асуджаны на 13 гадоў зняволення каталіцкі святар, былы пробашч парафіі ў Шуміліне айцец Анджэй Юхневіч. Прысуд у дачыненні да яго ўступіў у сілу 29 ліпеня, пасля таго, як Віцебскі абласны суд адмовіў святару ў змене прысуду, які ён абскардзіў, спрабуючы даказаць сваю невінаватасць.
Пасля гэтага айца Анджэя, які больш за год знаходзіўся ў СІЗА Віцебска, павінны былі накіраваць у калонію. Але, як даведаліся вернікі, святар апынуўся ў СІЗА Гомеля. Прынамсі, у першай палове жніўня ён знаходзіўся там, паведамляе Katolik.life.
Айца Анджэя маглі даставіць у Гомель пры этапаванні ў калонію – гэты працэс з'яўляецца надзвычай складаным для асуджанага і можа займаць некалькі тыдняў.
У сваю чаргу, дастаўленне ў Гомель, паводле старонкі, можа сведчыць пра тое, што святара накіравалі ў калонію №20 у Мазыры.
І ў СІЗА, і ў калоніі адмаўляюцца паведамляць па тэлефоне якую-небудзь інфармацыю на гэты конт.
Ксяндза Анджэя Юхневіча затрымалі 8 траўня 2024 года. Суд над ім адбыўся амаль праз год, у красавіку 2025 года ў Шуміліне і праходзіў у закрытым рэжыме, нагадвае «Свабода». З судовага раскладу вынікала, што яму інкрымінавалі тры крымінальныя артыкулы, якія тычацца полавых зносінаў з непаўналетнімі.
Вядома, што святар не прызнаваў ніякай віны, вернікі лічаць, што справа супраць яго сфабрыкаваная.
аз