Журналіст Павел Дабравольскі, які ўтрымліваецца ў СІЗА КДБ, абвінавачваецца ў «здрадзе дзяржаве». Яму пагражае да 15 гадоў пазбаўлення волі, паведамляе «Радыё Свабода».
Паводле інфармацыі выдання «Позірк», абвінавачанне звязана з прафесійнай дзейнасцю журналіста, які раней працаваў як у беларускіх, так і ў замежных СМІ, у тым ліку ва ўкраінскім часопісе NV.ua (да пачатку поўнамаштабнага ўварвання Расіі). Апошняе месца працы Дабравольскага ў Беларусі – незалежная інфармацыйная кампанія БелаПАН, частка супрацоўнікаў якой у лістападзе 2021 года, напярэдадні яе 30-годдзя, рашэннем КДБ была прызнаная «экстрэмісцкім фарміраваннем».
30 кастрычніка 2020 года журналіст быў затрыманы ў сваёй кватэры і потым арыштаваны на 15 сутак. Пасля ад’езду з Беларусі ў канцы 2021 года ён падарожнічаў па розных краінах, у тым ліку па Іране і Расіі, быў у Паўднёвай Амерыцы, а ў кастрычніку 2024 года вярнуўся ў Мінск.
Дабравольскі быў затрыманы сёлета 22 студзеня, праз дзесяць дзён пасля свайго 35-годдзя.
26 жніўня праваабарончая супольнасць прызнала яго палітвязнем.
вс