Пра гэта некалькі дзён таму напісаў у Фэйсбуку Сяргей Пінчук, які раней працаваў у гэтай сферы. Паводле інфармацыі «Люстэрка», кіраўнікоў пытаюцца пра палітычныя погляды, некаторых затрымліваюць на суткі, а кагосьці схіляюць да супрацоўніцтва.
Былы антыкрызісны кіраўнік Сяргей Пінчук лічыць, што ўлады дабраліся «да найбольш незразумелай, малапапулярнай і малалікай з вольных «прафесій»».
- Нармалізавалі за пяць гадоў адвакатаў, натарыусаў, падатковых кансультантаў, юрыстаў-гаспадарнікаў, рыэлтараў, творцаў і нават экскурсаводаў, – піша ён. – З кімсьці праводзяць прафілактычную гутарку з унясеннем у асабістую справу, камусьці трое сутак КПЗ з бамжамі. Хтосьці – двума тыднямі эпізадычных допытаў з наступнай згодай паведамляць аб любых падазроных гутарках.
Акрамя гэтага, паводле слоў Пінчука, Міністэрства эканомікі пачало пазбаўляць гэтых спецыялістаў атэстатаў, без якіх яны не могуць працаваць.
- Дзяржорган па справах аб банкруцтве тым часам, не абвяшчаючы праверак і не прымаючы тлумачэнняў, моўчкі адбірае ў кіраўнікоў атэстаты. Пачкамі, – канстатуе ён.
Па дадзеных крыніцы «Люстэрка» з гэтай сферы, актыўную ўвагу на антыкрызісных менеджараў звярнулі каля месяца таму. Суразмоўца СМІ ведае пра мінімум пяць калегаў, якіх выклікалі ў КДБ. Па словах крыніцы, сілавікі выбіраюць тых, хто хоць нейкім чынам паказваў прыкметы нелаяльнасці ўлады. Масавае пазбаўленне атэстатаў, па словах суразмоўцы, таксама адносна новая з'ява.
Люстэрка/ав