У лісце атрымальніку нагадваюць, што ягоны пашпарт цяпер несапраўдны праз сканчэнне тэрміну дзеяння, а таму могуць узнікнуць складанасці пры зваротах у розныя дзяржаўныя органы – страхавання, сацыяльнай абароны, банкі і падобныя. Фотаздымак апавяшчэння мужчына даслаў у рэдакцыю «Белсату».
«Дзеля ўрэгулявання сітуацыі вам неабходна звярнуцца і падаць адпаведны пакет дакументаў для абмену вашага пашпарта асобе, упаўнаважанай арганізацыяй, што здзяйсняе эксплуатацыю жыллёвага фонду (разлікова-даведкавы цэнтр, ЖЭС), жыллёва-будаўнічым (жыллёвым) кааператывам, таварыствам уласнікаў паводле месца вашай рэгістрацыі ці ў тэрытарыяльнае аддзяленне грамадзянства і міграцыі ў выпадку падачы заявы аб афармленні біяметрычных дакументаў», – гаворыцца ў лісце.
Атрымальніка папярэджваюць, што пражыванне без дакументаў ці з несапраўднымі дакументамі караецца штрафам памерам да 4 базавых велічыняў (180 рублёў) паводле ч. 3 арт. 24.33 Кодэксу аб адміністратыўных парушэннях Рэспублікі Беларусь.
Пра такія лісты беларусы апавядалі і раней, цягам 2025 года. На гэтыя выпадкі звяртаў увагу і Праваабарончы цэнтр «Вясна».
У лістападзе 2025 года гомельская міліцыя рассылала ўведамленні аб неабходнасці замяніць пашпарт няпоўнагадовым. Тых, хто жыве за мяжою, прасілі паведаміць пра гэта праз тэлефон.
Згодна з указам Аляксандра Лукашэнкі № 278, які набыў моц на пачатку верасня 2023 года, беларусы, якія жывуць за мяжою, не могуць абмяняць або прадоўжыць пашпартоў у амбасадах і консульствах, для гэтага ім неабходна асабіста прыехаць у Беларусь. У выніку людзі, якія ўцякалі з краіны праз рэпрэсіі і ў якіх скончыліся тэрміны дзеяння пашпартоў, вымушаныя жыць без гэтых дакументаў, бо не могуць вярнуцца ў Беларусь, баючыся пераследу. У такой сітуацыі цяпер і шмат няпоўнагадовых асобаў, якія ўцякалі з краіны разам з бацькамі.
У Аб’яднаным пераходным кабінеце Беларусі назвалі забарону на абмен пашпартоў за мяжой парушэннем Гаагскай канвенцыі 1961-га года.
Белсат/ав