Падрыхтоўку паседжання Вышэйшага дзяржсавета (ВДС) Саюзнай дзяржавы абмеркавалі ў тэлефоннай размове 8 лютага Аляксандр Лукашэнка і Уладзімір Пуцін, паведаміла прэс-служба Крамля. Мерапрыемства запланавана на 25 лютага.
«Закранаўся таксама шэраг актуальных пытанняў міжнароднага парадку дня», – адзначаецца ў рэлізе.
У паведамленні прэс-службы Лукашэнкі абмеркаванне паседжання ВДС названа галоўнай тэмай тэлефоннай размовы. Бакі «таксама абмеркавалі ў размове шэраг актуальных пытанняў беларуска-расійскіх адносін з акцэнтам на рэалізацыю сумесных праектаў», «закранулі міжнародную тэматыку, развіццё абстаноўкі ў рэгіёне».
Як нагадвае «Позірк», папярэдняе паседжанне ВДС прайшло 6 снежня 2024 года. Тады была зацверджаная агульная канцэпцыя бяспекі, заключаны міждзяржаўны дагавор аб гарантыях бяспекі. Лукашэнка пасля паседжання заявіў, што папрасіў Пуціна размясціць у Беларусі расійскія балістычныя ракеты сярэдняй далёкасці «Арэшнік».
Мінск заяўляе, што комплекс ужо знаходзіцца на тэрыторыі Беларусі. Аб’яднанне BelPol сцвярджае адваротнае.
аз