Мікалай Статкевіч выйшаў на волю, паведаміла ягоная жонка Марына Адамовіч, апублікаваўшы сумесны здымак.
Паводле яе, Мікалай перанёс інсульт і пакуль мае праблемы з мовай.
Як нагадвае «Вясна», 11 верасня Аляксандр Лукашэнка памілаваў Статкевіча і яшчэ 51 зняволенага. Усіх акрамя Мікалая прымусова перамясцілі з месцаў зняволення на тэрыторыю Літвы.
Мікалай Статкевіч адмовіўся ад дэпартацыі, а па дарозе да мяжы з Літвой выбіў дзверы аўтобуса і выскачыў на нейтральнай паласе паміж краінамі.
Праз некалькі гадзін ён вярнуўся на тэрыторыю Беларусі, дзе яго затрымалі і зноў вярнулі ў калонію.
Мікалая Статкевіча затрымалі напярэдадні прэзідэнцкіх выбараў 2020-га і пасля асудзілі на 14 гадоў пазбаўлення волі.
аз