Літоўскія памежнікі затрымалі групу з 30 нелегальных мігрантаў, якія трапілі ў краіну з Беларусі праз падкоп. Інцыдэнт адбыўся 6 красавіка ў Віленскім раёне: камеры зафіксавалі, як людзі па чарзе вылазілі з тунэля каля вёскі Баравікіне, — паведамляе Служба аховы дзяржаўнай мяжы Літвы.
У аперацыі па затрыманні нелегальных мігрнатаў удзельнічалі службовыя сабакі, дроны, верталёт і паліцыя. Большасць мігрантаў, якія разбіліся на групы, затрымалі цягам наступных сутак. Да серады ўдалося знайсці 27 чалавек.
Сярод затрыманых — грамадзяне Афганістана, Ірака і Пакістана. Частку вярнулі ў Беларусь, двое трапілі ў бальніцу. Таксама затрымалі некалькі чалавек, якія павінны былі перавезці мігрантаў у Польшчу, і меркаваных арганізатараў схемы. Імі кіравалі дыстанцыйна, перадаючы маршруты і інструкцыі.
Пошукі яшчэ траіх нелегалаў працягваюцца, распачата крымінальнае расследаванне.
эж