З’явілася версія, чаму быў затрыманы каталіцкі 65-гадовы святар з Вілейскага раёну Анатоль Парахневіч. Як піша Katolik.life, яе вылучылі вернікі, знаёмыя з сітуацыяй.
На думку вернікаў, святара маглі абвінаваціць у дапамозе па захаванні памяці грамадзян Польшчы, якія загінулі на тэрыторыі сучаснай Беларусі ў першай палове XX стагоддзя. Парахневіч на працягу ўсяго свайго служэння глыбока вывучаў гісторыю і культуру гэтага краю і клапаціўся пра яе захаванне. Канкрэтныя дэталі вернікі пакуль раскрываць не рашаюцца, каб гэтыя звесткі не былі выкарыстаныя супраць святара. Аднак яны лічаць неабходным агучыць інфармацыю — у надзеі, што яе публічнасць пасадзейнічае яго больш хуткаму вызваленню.
Таксама вернікі ведаюць, што Парахневіч адкрыта выступаў супраць расійскай агрэсіі ва Украіне і заклікаў да міру. У першыя дні вайны, у Папяльцовую сераду 2022 года, ён напісаў: «Пасыпаем попелам галовы, просячы ў Бога прабачэння… Бог літасцівы, Ён прабачыць… А ці прабачыць нам наша ўласнае сумленне?».
Нагадаем, пасля затрымання ксяндза 16 сакавіка ў вёсцы Альковічы сілавікі абшукалі дом святара і касцёл Найсвяцейшай Дзевы Марыі, апячаталі дом і канфіскавалі ключы ад храма. Іх вярнулі толькі праз тыдзень — нядзельная служба 22 сакавіка была адмененая, заўважае reform.news.
Месцазнаходжанне святара па-ранейшаму невядомае — меркавана, ён утрымліваецца ў следчым ізалятары КДБ у Мінску. У Парахневіча няма сваякоў, што дадаткова ўскладняе атрыманне інфармацыі пра яго.
Анатоль Парахневіч нарадзіўся 16 чэрвеня 1960 года ў Жлобінскім раёне, вырас сіратой, выхоўваўся ў дзіцячым доме, атрымаў духоўную адукацыю ў польскім Беластоку. Пасвячоны ў сан святара ў 1995 годзе. З 2007 года служыць у Альковічах, дзе заснаваў невялікі музей пры касцёле.
вс