У Беларусі плануюць унесці змены ў правілы перапісу насельніцтва. Гэта прадугледжана планам падрыхтоўкі праектаў заканадаўчых актаў на 2026 год, піша "Люстэрка".
Улады маюць намер унесці змены, каб "аптымізаваць працэс арганізацыі і правядзення наступнага раўнда перапісу насельніцтва".
Сярод іншага чыноўнікі хочуць замацаваць магчымасць запаўнення рэспандэнтамі перапісных лістоў праз спецыялізаванае праграмнае забеспячэнне ў інтэрнэце. Яшчэ адна ідэя — знізіць узрост рэспандэнтаў, якія самастойна могуць прадастаўляць персанальныя дадзеныя аб сабе, да 15 гадоў (на дату правядзення перапісу).
— Падрыхтоўка законапраекта дасць магчымасць устараніць прабелы ў прававым рэгуляванні грамадскіх адносін, а таксама вырашыць праблемныя пытанні, якія ўзнікаюць пры падрыхтоўцы і правядзенні перапісу насельніцтва, — гаворыцца ў абгрунтаванні да законапраекта.
Раней у Белстаце заявілі, што перапіс насельніцтва Беларусі павінен прайсці ў кастрычніку 2029 года. Спецыялісты пачалі падрыхтоўку. Напрыклад, Белстат плануе максімальна выкарыстоўваць альтэрнатыўныя крыніцы даных і сучасныя інфармацыйныя тэхналогіі.
нг