Эксперты ААН занепакоеныя выпадкамі катаванняў, спробаў самагубства, смерці ды рэпрэсій у месцах пазбаўлення волі ў Беларусі

Датычна выпадкаў, пра якія ім стала вядома, эксперты ААН накіравалі зварот ураду Беларусі.

Генеральная асамблея ААН

Shutterstock/lev radin

Эксперты ААН выказалі сур'ёзную занепакоенасць у сувязі з паведамленнямі аб працяглым утрыманні без сувязі са знешнім светам і ўмовах утрымання ў папраўчай калоніі ў Наваполацку, паведамляе «Вясна».

Іхную занепакоенасць выклікала, у тым ліку справа журналіста і блогера Ігара Лосіка, які быў адвольна затрыманы з чэрвеня 2022 года да верасня 2025 года паводле палітычна матываваных абвінавачванняў і ўтрымліваўся ў розных установах у Беларусі, уключна з папраўчай калоніяй № 1 у Наваполацку.

— Атрыманая намі інфармацыя паказвае на вельмі трывожную практыку ўтрымання пад вартай, якая можа ўяўляць сабой сурʼёзныя парушэнні міжнароднага права, — заявілі эксперты. — Мы глыбока занепакоеныя тым, што зняволеныя ў наваполацкай калоніі могуць зазнаваць працяглае адзіночнае зняволенне, дысцыплінарныя спагнанні ды фізічныя пакаранні пасля спробаў самагубства, пазбаўленне неабходнай медычнай дапамогі ды рэпрэсіі за спробы падаць скаргі, асабліва пасля канфідэнцыйных сустрэч з псіхолагам калоніі, — адзначылі яны.

Эксперты ААН таксама выказалі занепакоенасць у сувязі з паведамленнем пра смерць у 2023 годзе пажылога зняволенага з праблемамі са здароўем, які ўтрымліваўся ва ўмовах дысцыплінарнай ізаляцыі без належнай медычнай дапамогі.

Датычна дадзеных выпадкаў 16 сакавіка 2026 года эксперты ААН накіравалі зварот ураду Беларусі.

аз