Ваенных камісараў у рэгіёнах падключаць да выканання даручэння Аляксандра Лукашэнкі аб накіраванні ў армію «нядобрасумленных і недысцыплінаваных» працаўнікоў уборачнай кампаніі, паведаміў міністр абароны Беларусі Віктар Хрэнін.
Ініцыятыва падключыць ваенных камісараў да адпраўкі ў армію тых, хто кепска працуе, належыць самому Хрэніну.
— Я даклаў, як будзе выконвацца даручэнне кіраўніка дзяржавы. Да гэтай працы цяпер будуць падключаныя ваенкомы, якія ў бліжэйшы час правядуць сумесныя нарады з кіраўнікамі мясцовых органаў улады на месцах і вызначацца з паслядоўнасцю дзеянняў.
Міністр абароны запэўніў, аднак, што гаворка не ідзе пра тое, каб некага перавыхоўваць.
— Будзем браць дзеля таго, каб удасканальваць баявую выўчку нашых людзей, асабліва ваеннаабавязаных, — сказаў Хрэнін.
Таксама міністр распавёў, як ваенныя ўдзельнічаюць ва ўборачнай кампаніі:
— Мы, людзі ў пагонах, у барацьбе за ўраджай ні ў якім выпадку не знаходзімся ўбаку. Я дэталёва даклаў кіраўніку дзяржавы, дзе ваеннаслужачыя выконваюць задачы, колькі і якой тэхнікі нам выдзелілі, якіх паказнікаў дасягнулі і ў якіх аб’ёмах.
Аляксандр Лукашэнка 21 ліпеня праводзіў селектарную нараду па сельскай гаспадарцы. Паводле дзяржаўнага інфармагенцтва БелТА, ён разважаў пра парушэнні працоўнай дысцыпліны і проста «кепскую працу» ў сельскай гаспадарцы — і прасіў перадаць міністру абароны Віктару Хрэніну наступны загад.
— Усіх, хто не ўмее працаваць, у войска і на паўднёвую мяжу. У лес. Там нашыя хлопцы, Сілы спецыяльных аперацыяў, паводле майго загаду разгрупаваныя на ўкраінскай мяжы. <…>. Гэта не азначае, што мы зьіраемся на кагосьці нападаць. Мы ні на кога не нападаем, мы забяспечваем сваю бяспеку. Там нялёгка: камарыкі, мухі, мошкі і іншае. Вось туды іх, у войска. Звычайнымі салдатамі. Тыдзень падрыхтоўкі, гранатамёт, кулямёт — і туды, у распараджэнне Сілаў спецыяльных аперацыяў. <…>. Не ўмееш круціць гайкі? Будзеш памочнікам, будзеш падносіць снарады. За любое невыкананне — у войска, — казаў Лукашэнка.
Белсат/ав