Латвійскія памежнікі і паліцыянты з 14 жніўня скануюць грунт уздоўж латвійска-беларускай мяжы, каб выявіць магчымыя падземныя хады. Як паведамляе «Радыё Свабода», для гэтага выкарыстоўваюць геалагічны радар: падазроныя змены ў слаях грунту правяраюць дадаткова.
Пошукі пачаліся пасля таго, як 10 жніўня каля закрытага памежнага пункта Сіленэ затрымалі 15 чалавек, якія перабраліся з Беларусі праз тунэль. Яго выхад знаходзіўся прыкладна за 10 метраў ад памежнай агароджы. Гэта быў першы вядомы выпадак выкарыстання тунэля для нелегальнага перасячэння мяжы ў Латвіі.
11 жніўня ў краіне пачалася аперацыя «Пярэварацень» супраць нелегальнай міграцыі, якая працягнецца як мінімум да канца месяца. Ад пачатку года на латвійска-беларускай мяжы затрымалі каля 9,5 тысячы незаконных мігрантаў.
эж