Аляксандр Лукашэнка напрыканцы жніўня правёў у Маскве сустрэчы з расійскім прэм’ерам Міхаілам Мішусціным і прэзідэнтам Уладзімірам Пуціным. Перад гэтым у Мінску ён сустракаўся з віцэ-прэм’ерам Расіі Дзянісам Мантуравым.
Палітычны аналітык Арцём Шрайбман лічыць, што такі ланцужок перамоў не быў выпадковым. Паводле яго, на ўсіх трох сустрэчах абмяркоўвалася супрацоўніцтва ў сферы мікраэлектронікі.
Аналітык мяркуе, што можа рыхтавацца буйны праект, звязаны з беларускай прамысловасцю і расійскім ваенна-прамысловым комплексам. Беларусь ужо пастаўляе Расіі электронныя кампаненты, якія выкарыстоўваюцца ў вытворчасці ўзбраенняў.
Разам з тым, за кулісамі могуць ісці перамовы і па іншых эканамічных пытаннях — напрыклад, пра расійскія інвестыцыі альбо продаж беларускіх актываў.
Шрайбман называе гэта «напружаным гандлем за шторкай». Паводле яго, тое, што Лукашэнка паслядоўна сустракаўся з рознымі ўзроўнямі расійскай улады, можа сведчыць пра складаныя перамовы.
Аналітык не выключае, што на сустрэчы з Пуціным бакі ўжо маглі дасягнуць дамоўленасцяў, але іх вынікі пакуль не раскрываюць.
Крыніца: "Люстэрка"
нг