Грамадзяніна Расіі, палітвязня Сяргея Жукоўскага асудзілі ў Беларусі на тры гады пазбаўлення волі ва ўмовах узмоцненага рэжыму. Яго прызналі вінаватым паводле часткі 2 артыкула 361-4 Крымінальнага кодэкса (садзейнічанне экстрэмісцкай дзейнасці), паведамляе «Вясна».
Сяргей Жукоўскі — грамадзянін Расіі. Нарадзіўся 12 жніўня 1983 года. Да суда ён утрымліваўся ў СІЗА № 1. Падрабязнасці крымінальнай справы, у тым ліку тое, якія менавіта дзеянні следства і суд палічылі «садзейнічаннем экстрэмісцкай дзейнасці», невядомыя.
Артыкул 361-4 Крымінальнага кодэкса беларускія ўлады шырока выкарыстоўваюць для ціску на палітычна актыўных людзей. Пад крымінальны пераслед трапляюць не толькі грамадзяне Беларусі, але і замежнікі, а яго вынікам становяцца рэальныя тэрміны зняволення.
Нагадаем, што з 2020 года ў Беларусі праваабаронцы зафіксавалі больш за 100 000 фактаў палітычна матываванага пераследу.
аз