15 верасня ў Варшаве беларуская дэмакратычная лідарка Святлана Ціханоўская сустрэлася з дырэктарам Музея бітвы пад Грунвальдам у Стэмбарку, гісторыкам доктарам Шымонам Дрэем, паведамляе прэс-служба кіраўнічкі Аб’яднанага Пераходнага Кабінета.
У сустрэчы таксама ўзялі ўдзел Юрый Меляшкевіч, ініцыятар кампаніі за ўсталяванне бел-чырвона-белага сцяга на Грунвальдскім полі, і Франак Вячорка, галоўны дарадца Святланы Ціханоўскай.
Святлана Ціханоўская падзякавала Шымону Дрэю за падтрымку ініцыятывы зрабіць больш заўважным удзел ваяроў з земляў сучаснай Беларусі ў Грунвальдскай бітве і штогадовых памятных мерапрыемствах.
— Грунвальдская бітва — адна з найважнейшых падзей нашай гісторыі. Яна нагадвае, што беларуская гісторыя — неад’емная частка еўрапейскай. Ужо шмат гадоў беларусы прыязджаюць на Грунвальдскае поле з бел-чырвона-белымі сцягамі. Для нас гэтае месца такое ж важнае і сімвалічнае, як і для палякаў, літоўцаў і ўкраінцаў. Праз супрацоўніцтва з музеем мы хочам зрабіць беларускую прысутнасць больш бачнай і ўмацаваць сувязі паміж нашымі народамі, — адзначыла Святлана Ціханоўская.
Бакі дамовіліся наладзіць доўгатэрміновае супрацоўніцтва, падрыхтаваць беларускую версію аўдыягіда і забяспечыць удзел прадстаўнікоў беларускіх дэмакратычных сіл у міжнародных мерапрыемствах музея разам з партнёрамі з Польшчы, Літвы і Украіны.
Да наступнай гадавіны бітвы ў ліпені 2027 года плануецца падрыхтаваць больш шырокі ўдзел беларускай супольнасці і беларускіх гістарычных рэканструктараў у Грунвальдскіх урачыстасцях.
Удзельнікі сустрэчы таксама абмеркавалі магчымасць стварэння на Грунвальдскім полі памятнага знака, прысвечанага ваярам з земляў сучаснай Беларусі, а таксама ўсталявання флагштока з бел-чырвона-белым сцягам.
аз