Радыё Свабода цытуе словы сваячкі палітвязня пра стан Вацлава Арэшкі: «Раней бачыў свет і цень, цяпер ужо і гэтага няма. А пра тое, як гэтаму дае рады, нічога не расказвае, абыходзіць гэтую цяжкую тэму. Тры дні таму даслаў ліст, павіншаваў унукаў з днямі народзінаў. Некалькі словаў нават напісаў сваёй рукой, праўда, неразборліва ў яго атрымалася, амаль нічога не ўдалося прачытаць, але добра, што намагаецца».
Паводле крыніцы, адміністрацыя калоніі № 22, дзе трымаюць палітвязня Арэшку, прапаноўвала яму этапам адправіцца ў шпіталь, але ён адмовіўся.
— Наколькі ведаю, баіцца ехаць у шпіталь, бо можа не вытрымаць этапу. Тое, што распавядаў пра Вацлава журналіст Семчанка — усё так і ёсць, — дадала крыніца.
У верасні пра дрэнны стан Вацлава Арэшкі распавядаў на тэлеканале «Белсат» журналіст Дзмітрый Семчанка, які адбываў свой тэрмін у той жа івацэвіцкай калоніі.
Вацлаву Арэшку 71 год. Паводле сваячкі палітвязня, ён таксама мае іншыя хваробы.
Крыніца: Радыё Свабода/юл