Ціхана Осіпава будуць судзіць трэці раз за «непадпарадкаванне адміністрацыі калоніі»

Палітвязня ў траўні 2021 года асудзілі да 11 гадоў калоніі ўзмоцненага рэжыму. Пад вартай ён утрымліваецца са жніўня 2020 года.

Ціхан Осіпаў

spring96.org

Палітвязня Ціхана Осіпава ўтрымліваюць за кратамі са жніўня 2020 года. У 2021 годзе яго асудзілі да 11 гадоў калоніі паводле трох артыкулаў Крымінальнага кодэкса. У зняволенні на яго ўвесь час аказваецца ціск: яго месяцамі ўтрымліваюць у ШІЗА і ПКТ.

Як нагадвае «Вясна», палітвязня ўжо двойчы асудзілі за «злоснае непадпарадкаванне адміністрацыі калоніі» паводле арт. 411 Крымінальнага кодэкса, агулам дадаткова прызначыўшы яшчэ два гады і два месяцы пазбаўлення волі.

Цяпер былая палітзняволеная Антаніна Канавалава паведаміла, што супраць яго ўзбудзілі трэцюю крымінальную справу за «непадпарадкаванне».

У зняволенні ў палітвязня пачаліся сур'ёзныя праблемы са здароўем, у тым ліку з хрыбетнікам і сэрцам. Цяпер Ціхан утрымліваецца ў ШІЗА ў ваўкавыскай калоніі № 11.

Ціхана Осіпава ў траўні 2021 года асудзілі да 11 гадоў калоніі ўзмоцненага рэжыму за наезд на пяць вайскоўцаў падчас пратэстаў у жніўні 2020 года, удзел у масавых беспарадках, а таксама за ілжывы данос (пасля ДТЗ хлопец заехаў на машыне ў вадаём, пакінуў яе там і заявіў аб угоне). Пад вартай Ціхан утрымліваецца з 14 жніўня 2020 года.

У 2022 годзе адміністрацыя магілёўскай калоніі № 15 ініцыявала ўзбуджэнне крымінальнай справы супраць палітвязня паводле ч. 2 арт. 411 КК (злоснае непадпарадкаванне патрабаванням адміністрацыі папраўчай установы). Суддзя Кастрычніцкага раёна Магілёва Наталля Крашкіна прызначыла Ціхану яшчэ сем месяцаў зняволення і змяніла рэжым з узмоцненага на строгі. У сярэдзіне сакавіка ў судзе Мазырскага раёна адбыўся ўжо трэці суд над палітвязнем Ціханам Осіпавым. Яго прызналі вінаватым паводле ч. 2 арт. 411 Крымінальнага кодэкса і дадалі яму яшчэ паўтара года калоніі ў дадатак да 11 гадоў і сямі месяцаў зняволення.

Цяпер былая палітзняволеная Антаніна Канавалава паведаміла, што 9 кастрычніка 2026 года ў дачыненні да палітвязня Ціхана Осіпава распачалі чарговую крымінальную справу паводле арт. 411 КК Рэспублікі Беларусь «злоснае непадпарадкаванне патрабаванням адміністрацыі папраўчай установы». У папярэдняй справе, паводле якой дадалі яшчэ паўтара года зняволення, яму ставілі ў віну больш за 25 парушэнняў.

аз