19 кастрычніка падчас выканання баявога задання ва Украіне загінуў 34-гадовы беларускі добраахвотнік Віталь Трыгубаў з пазыўным «Вітушка». Паводле Беларускага добраахвотніцкага корпуса, у апошнім баі ён прыкрыў сабой пабрацімаў з батальёна Hatred.
Як паведамляе «Наша Ніва», Трыгубаў быў актывістам «Маладога фронту», удзельнічаў у абароне Курапатаў і неаднаразова падвяргаўся затрыманням у Беларусі. Пасля пераследу ён пакінуў Беларусь і незадоўга да расійскага ўварвання пераехаў у Вільню. Аднак у лютым 2022 года адправіўся абараняць Украіну ад расійскай агрэсіі.
Віталь Трыгубаў ваяваў у беларускіх падраздзяленнях «Волат» і «Тэрор», пазней далучыўся да Беларускага добраахвотніцкага корпуса.
Ягоны знаёмы, прадстаўнік BELPOL Уладзімір Жыгар, назваў загінулага сапраўдным патрыётам і добрым сябрам.
Паводле ацэнкі былой кіраўніцы Місіі дэмакратычных сілаў Беларусі ў Кіеве Святланы Шацілінай, у баях за Украіну загінулі каля 100 беларускіх добраахвотнікаў.
эж