За адну ноч ва ўнутранай турме НКУС расстралялі больш за сто прадстаўнікоў беларускай інтэлігенцыі і нацыянальнай эліты, у тым ліку 22 літаратараў.
30 кастрычніка Вольны Хор выступіць у касцёле святой Ганны ў Варшаве з адмысловай праграмай, прысвечанай Ночы расстраляных паэтаў. У канцэрце таксама прымуць удзел беларускія акторы. Акрамя песень, прагучаць вершы расстраляных паэтаў і аповеды пра жыццё і творчасць беларускіх аўтараў, якія сталі ахвярамі рэпрэсій.
У гэты вечар хор заспявае творы на вершы забітых паэтаў — Алеся Дудара, Цішкі Гартнага і Міхася Чарота. Прагучаць таксама творы аўтараў, якія прайшлі праз суды, турмы, лагеры і вымушаную эміграцыю, але засталіся на беларускай культурнай глебе: Міколы Куліковіча, Наталлі Арсенневай, Міколы Равенскага, Міхася Кавыля, Сяргея Новіка-Пеюна і іншых.
У канцэрце прагучаць творы Уладзіміра Тэраўскага — беларускага кампазітара і дырыжора першага беларускага хору, расстралянага ў 1938 годзе. А таксама творы сучасных беларускіх кампазітараў, якія, нягледзячы на вымушаную эміграцыю, не згубілі сувязі з Радзімай і працягваюць ствараць і прасоўваць беларускую культуру за мяжой.
Падчас канцэрта адбудуцца прэм’еры твораў сучасных беларускіх паэтаў і кампазітараў, напісаныя ў турмах.
ав