У трэцім квартале 2026 года ў Грузію ўехала 97 120 грамадзян Беларусі, то бок — на 7 044 менш, чым выехала з яе (104 064), сведчыць праведзены «Позіркам» аналіз звестак мясцовай паліцыі, у сферу адказнасці якой уваходзіць памежны кантроль.
Паводле гэтых паказчыкаў, беларусы занялі сёмае месца пасля грамадзян Расіі, Турцыі, Арменіі, краін Еўрасаюза, Ізраіля і Азербайджана.
У першым квартале ў Грузію ўехала 21 073 грамадзяне Беларусі, выехалі з яе — 21 424, або на 351 больш. Статыстыка другога квартала: заехала 47 413, выехала 38 010, або на 9 403 менш, чым заехалі.
Такім чынам, за 9 месяцаў 2026 года колькасць суайчыннікаў, якія заехалі ў Грузію, перавысіла колькасць тых, хто выехаў з яе, на 2 008.
У 2025 годзе з Грузіі выехала на 442 беларусы больш, чым уехала ў яе: у краіну прыбылі 189 894 грамадзяне Беларусі, выехалі — 190 336.
Праблемы дыяспары абмяркоўваліся 12 лістапада на першай сустрэчы Святланы Ціханоўскай і прэм’ер-міністра Грузіі Іраклія Кабахідзэ. Бакі дамовіліся працягнуць кансультацыі, паведаміў «Позірку» дарадца дэмлідара Дзяніс Кучынскі. Пры гэтым, паводле яго слоў, беларускі бок «падкрэсліў недапушчальнасць дэпартацыі беларусаў, якім на радзіме пагражае палітычны пераслед».
Як паведамляў «Позірк» са спасылкай на паліцыю Грузіі, за тры кварталы 2026 года з краіны выслалі 39 грамадзян Беларусі (рэкордны паказчык для аднаго года). Гэта адбываецца ў рамках шырокай кампаніі ўладаў па барацьбе з нелегальнай міграцыяй. План на 2026 год — выслаць 4 тысячы замежнікаў. За 9 месяцаў план выкананы амаль на 80% (3 170).
аз