Сёлетнія даходы ад лясгасаў Беларусі ад замежнага паляўнічага турызму перавысілі $1 млн, паведаміў начальнік аддзела паляўнічай гаспадаркі Мінлясгаса Аляксандр Казарэз, словы якога цытуе дзяржагенцтва «БЕЛТА».
У Мінлясгасе расказалі, як у Беларусі змянілася колькасць паляўнічых відаў жывёл. Аляксандр Казарэз адзначыў, што даходы ад аказання такіх паслуг павялічваюцца.
— Калі ў мінулым годзе за ўвесь сезон зарабілі $1 млн, то ў 2026-м столькі атрымалі ўжо да пачатку лістапада, — расказаў ён.
Паводле чыноўніка, усё больш паляўнічых, асабліва замежных, прываблівае паляванне на высакароднага аленя. Карыстаецца попытам паляванне на лася, зубра. Выклікае цікавасць паляванне на мядзведзя, якое было дазволена ў 2025 годзе пасля шматгадовай забароны.
— У мінулым годзе здабылі 37 мядзведзяў, у гэтым плануем здабыць 65. Магчыма, лічба яшчэ павялічыцца, бо былі ўнесены змяненні ў адпаведную інструкцыю. Ужо больш як палавіна ліміту здабыта, — адзначыў Аляксандр Казарэз.
У мінулым годзе ў цэлым даходы ад паляўнічага турызму склалі каля 17 млн рублёў. Прагназуецца, што па выніках 2026 года гэтая лічба вырасце.
аз