За аснову возьмуць досвед Казахстана, дзе вучняў прыцягваюць да адміністрацыйнай адказнасці. Пра гэта ў сераду падчас наведвання педагагічнага каледжу ў Ваўкавыску заявіла намеснік кіраўніка Адміністрацыі прэзідэнта Вольга Чупрыс, паведамляе Еўрарадыё.
Чупрыс падкрэсліла неабходнасць узмацнення прававой абароны настаўнікаў, паколькі пачасціліся выпадкі "недастойных паводзін" вучняў. Напрыклад, у Кодэксе аб адміністрацыйных правапарушэннях можа з'явіцца артыкул за абразу педагога.
"Апошнім часам адбываецца нямала падзей негатыўнага характару, калі вучні спрабуюць ціснуць на педагога, а часам і абражаюць яго, — заявіла намесніца кіраўніка Адміністрацыі Лукашэнкі. — Грамадству неабходна стаць на абарону настаўніка".
Падчас паездкі ў Ваўкавыск Чупрыс выказалася і пра заробкі бюджэтнікаў. Паводле яе слоў, Адміністрацыя адсочвае сітуацыю, а асобныя выпадкі з "перакосамі" ў налічэнні заробкаў адбыліся з-за няправільных падлікаў.
эж