Гродзенец Сяргей Верамеенка распавёў, што ліст атрымала адна з дзяўчын, якая ўваходзіла ў каманду Ціханоўскага. Яна дасылала яму паштоўку, якую зрабілі адмыслова з яго выявай супрацоўнікі крамы «Адметнасць» і малады гродзенскі мастак.
Як выявілася паштоўка яму вельмі спадабалася і ў кароткім лісце ён выказвае гродзенцам удзячнасць за падтрымку і перадае прывітанне хлопцам з «Адметнасці», мастаку і ўсяму Гродна.
Верамеенка распавёў, што падобныя паштоўкі яны рассылалі ўсім палітвязням. Людзі іх набывалі па свабодных коштах, а сродкі сабраныя ад іх продажу таксама накіроўваліся на падтрымку затрыманых і асуджаных.
У краме «Адметнасць» сказалі, што паштоўкі і надалей можна набыць у іх і даслаць палітзняволеным.
«Па меры мажлівасці будзем працягваць гэта рабіць і заклікаць людзей падтрымліваць палітзняволеных».
У сваім кароткім лісце Ціханоўскі напісаў: «Прыеду, як змагу. Будзем адзначаць нашу перамогу».
Алесь ЗАВІНОЎСКІ