Старшыня Гродзенскага аблвыканкама Уладзімір Каранік прапанаваў апазіцыі абмеркаваць бягучую сацыяльна-палітычную абстаноўку. Апазіцыя прапанавала яму сустрэцца ў Каложскім парку, дзе і забаранілі праводзіць мітынг.
Гродзенскія ўлады адмовілі апазіцыі ў правядзенні мітынга 11 кастрычніка ў Каложскім парку, спаслаўшыся на санэпідэміялагічную сітуацыю.
Старшыня аблвыканкама Уладзімір Каранік патлумачыў, што адмовілі не толькі апазіцыі, але і прыхільнікам дзеючай улады. Маўляў, прапанавалі перанесці мерапрыемствы.
Ён таксама прапанаваў апазіцыі стварыць ініцыятыўную групу і абмеркаваць цякучую сацыяльна-палітычную абстаноўку.
Адзін з ініцыятараў правядзення мітынгу Дзмітры Бандарчук напісаў Караніку, што адмова аб правядзенні масавага мерапрыемства будзе абскарджана ў судзе.
А таксама нагадаў, што больш месяца апазіцыя чакае адказу на пісьмовы зварот для абмеркавання фарміравання Савета народнага даверу. І ўнёс прапанову:
-Лепш сустрэцца ў нядзелю ў Каложскім парку 11 кастрычніка ў 14.00 з улікам усіх эпідэміялагічных мер і там можна абмеркаваць і грамадскія, і палітычныя, і любыя іншыя пытанні.
Алесь ЗАВІНОЎСКІ