Літоўскі аператар сістэмы перадачы электраэнергіі Litgrid паведаміў на сваім сайце, што з поўдня 8 лістапада электраэнергія на Беларускай АЭС у Астраўцы не вырабляецца. Міністэрства энергетыкі Беларусі змясціла свой каментар.
У паведамленні Міністэрства энергетыкі Беларусі гаворыцца, што на першым энергаблоку працягваецца этап выпрабаванняў.
Выяўлена неабходнасць замены асобнага электратэхнічнага абсталявання. Якога канкрэтна абсталявання ў Мінэнерга не патлумачылі.
Тым часам крыніца tut.by паведаміла, што прычынай спынення сталі выбухі некалькіх трансфарматараў напругі на адным з агрэгатаў, якія спалучаны з генератарам.
Паводле адмыслоўцаў, нічога звыш незвычайнага не адбылося, але расследаванне, аднаўленне схемы падачы магутнасці і паўторная наладка зоймуць шмат часу.
У бліжэйшы час станцыя энергію выпрацоўваць не будзе. Адмыслоўцы кажуць, што на бяспеку рэктара з пункту погляду ўцечкі радыяцыі такі інцыдэнт уздзеяння не аказвае.
Нагадаем, што 7 лістапада на адкрыцці атамнай станцыі прысутнічаў Аляксандр Лукашэнка.
Алесь ЗАВІНОЎСКІ