Як паведамляе Следчы камітэт, Фрунзенскім Мінскім раённым аддзелам Следчага камітэта распачата крымінальная справа па факце арганізацыі дзеянняў, якія груба парушаюць грамадскі парадак, і актыўнага ўдзелу ў іх па ч. 1 арт. 342 Крымінальнага кодэкса за падзеі 15 лістапада ў Мінску. У сталіцы праходзіў Марш памяці забітага жыхара «Плошчы Перамен» Рамана Бандарэнкі – «Выходжу!» Акрамя гэтага, па інфармацыі СК былі ўзбуджаныя крымінальныя справы па ч. 1 арт. 339 Крымінальнага кодэкса (хуліганства).
«Паводле звестак следства, 15 лістапада на тэрыторыі сталіцы прайшлі несанкцыянаваныя масавыя мерапрыемствы, падчас якіх затрыманы шэраг грамадзян, якія груба парушылі грамадскі парадак. Іх дзеянні былі спалучаныя з відавочным непадпарадкаваннем патрабаванням прадстаўнікоў улады і пацягнулі парушэнне працы транспарту і арганізацый.
Таксама пашкоджаныя аб'екты гарадской інфраструктуры і транспартныя сродкі супрацоўнікаў органаў унутраных спраў. Па дадзеным факце распачаты крымінальныя справы па ч. 1 арт. 339 (хуліганства) Крымінальнага кодэкса», – гаворыцца ў заяве ведамства.
Колькі ў справе фігурантаў – пакуль не паведамляюць. Але ўжо вядома, што ў якасці падазраванай па ч. 1 арт. 342 Крымінальнага кодэкса праходзіць затрыманая на «Плошчы Перамен» журналістка «Белсату» Кацярына Андрэева. Яна ўчора вяла стрым з падзей, якія разгортваліся ў двары. Абставіны затрымання журналісткі невядомыя, але яна змагла паведаміць блізкім, што ёй ставяць у віну крымінальны артыкул 342 – «арганізацыя групавых дзеянняў». Каля 22:00 15 лістапада следчыя СК прыходзілі па месцы прапіскі мужа Кацярыны Андрэевай, журналіста Ігара Ільяша.
Паводле інфармацыі Праваабарончага цэнтра «Вясна», 15 лістапада ў Беларусі падчас пратэстных акцый было затрымана мінімум 1278 чалавек.
ав