19 студзеня працягнуўся працэс “па справе Ціханоўскага”. Ізноў у зале суда не хапіла месца для ўсіх ахвотных прысутнічаць на працэсе. Пры гэтым на ўваходзе ў суд міліцыянеры пачалі перапісваць прозвішчы тых, хто прыйшоў менавіта на гэты працэс.
Сёння працягваўся допыт Дзмітрыя Фурманава. 29 мая ён сядзеў на плошчы і збіраў подпісы за Святлану Ціханоўскую.
Калі пачалі хапаць людзей з натоўпу, да яго падбеглі АМАПаўцы, схапілі за рукі і пацягнулі праз сквер да машыны.
Гэта адбылося на вачах ягоных бацькоў. Фурманаў падчас допыту яшчэ раз падкрэсліў, што ніякіх заклікаў да насілля і парушэння грамадскага парадку 29 мая не было.
Дарэчы, сёння высветлілася, што ў спісе сведкаў няма прозвішча жанчыны, якая чаплялася з рознымі пытаннямі да Ціханоўскага на пікеце, і з-за чаго і пачаўся ўвесь канфлікт.
Паколькі ў суд не з’явіліся пацярпелыя быў аб’яўлены перапынак да 28 студзеня.
Алесь Завіноўскі