Сёння раніцай папулярная беларуская TikTok-блогерка Жанна Лаўрова выйшла ў эфір. Учора ГУБАЗіК напісаў, што жанчына затрыманая. Ейныя каналы нейкі час былі недаступныя, але іх аднавілі, паведамляе «Наша Ніва».
Жанна Лаўрова не распавядала пра падрабязнасці ўчарашняга дня. Сказала, што застаецца са сваімі гледачамі і збягаць не збіраецца. «Я хачу жыць у сваёй краіне, мне тут спакойна, добра. Мільён разоў гэта казала», – заявіла жанчына.
Яна падзякавала тым, хто ўчора падтрымаў яе, і тым, хто «перакруціў ». «Гэта для мяне таксама вялізны досвед, вялізныя вывады, таму таксама дзякуй», – сказала яна.
У адным з апошніх стрымаў Лаўрова сказала, што «яе сасіскі троху падгарэлі, бо прыляцеў бумеранг, таму што ёй шкада і ўкраінскіх дзяцей». Гэтыя словы выдраў з кантэксту (з некалькіх хвілінаў роліку пакінуўшы 10 секунд) прапагандыст Канстанцін Прыдыбайла. Ён апублікаваў у сваіх сацсетках допіс, дзе заклікаў сілавікоў арыштаваць жанчыну.
Лаўровай пагражалі крымінальнай справай за «прапаганду тэрарызму» і сямю гадамі турмы. У якім статусе знаходзіцца жанчына, невядома.
аз